ҚАС  ПЕН ДОС

Белгісі қас адамның қара тастай,

Белгісі дос адамның қарлығаштай.

Көз қараудан байқалар көңіл күйің,

Қарсы болар ішінен жаза баспай.

Ақиық айналады тау басынан,

Ілінсе дау кетпейді сау басыңнан.

Дос болсаң жан аямас жақынмен бол,

Тамырдың аулақ боп жүр даубасынан.

Ат мінсең көңіл ашар қазанаттан,

Дос болсаң көңіл қалмас азаматтан.

Арыстан ұрып жатсақ мыңқ етпейді,

Бық етпес нар баласы соғып жатсаң.

Қас батыр дұшпанына жалынбайды,

Өлсе де сырын айтып бағынбайды.

Мал түгіл жан аямас достар тапқан,

Мұндай дос ағайыннан табылмайды.

Дос болсаң артық-кемді санаспағын,

Мал үшін араз болып таласпағын.

Қолқа іздеп жыл өткенде қуып келген

Саудагер сараңдарға жанаспағын.

1961